شاعیر: ئاوات
کتێب: شاری دڵ
سەرناو: ئاڵ و واڵا
لەبارەی شیعر: گەردیگلان، ١٣٢٠ی هەتاوی - (لاپەڕە ٩٤ ی چاپی ئەنیسی و ٢٣٠ ی چاپی جەعفەر)

چ خۆشە بەژنی بەرز و قەدد و باڵای
جوانە ڕەوت و ڕۆیی و ئاڵ و واڵای [١] 

حەقت بوو بەختی من، ئەی زولفی ڕەش‌مار! 
که سەرتاپێ له بەژنی بەرزی هاڵای

ئەگەرچی هەر دەخوێنم دەرسی عیشقی
بەڵام هـەروا گرانیشه موتاڵای

دڵم هەر کورکه‌کورکی بوو له دووری [٢] 
بڵێی جارێک بگاته گوێی، سکاڵای؟ 

سەراپا گەنجه لەنجەی، موشتەری خۆم
بە کێی داوه 'ئیمامی'! ئاخۆ کاڵای؟ 

١. چاپی ئەنیسی: ڕەوت و ڕۆین و... 
٢. چاپی ئەنیسی: دوری